Cerita Tentang Guru Mangaloksa

Guru mangaloksa

Ia ompunta Guru Mangaloksa ima anak ni si Radja Hasibuan. Opat do anak ni Guru Mangaloksa, ima si Radja Hutabarat, Panggabean, Hutagalung dohot Hutatoruan. Djala si Radja Hutapea ma dohot si Radja Lumban Tobing anak ni si Radja Hutatoruan.

Sian si Radja Batak molo tarradjum tu sundut papituhon ma ompunta si Guru Mangaloksa, Lima nasida marhamaranggi ima :
1. Radja Mandjalo na marhuta di Djandji Matogu Sigaol,
2. Guru Mangaloksa di Silindung,
3. Guru Hinobaan di Angkola dohot
4. Guru Marjalang
5. Guru Tonga Maniti di Rantau Parapat.

Ia si Radja Hasibuan, ima siampudan ni Radja Sobu djala Raja Tinandang ma siahaan na umpompar marga Sitompul. Sada do haha ni Radja Sobu ima Radja Sumba djala sada angina ima Radja Naipospos anak ni Tuan Sorba ni Banua tubu ni boru Sibasopaet.

Adong do opat iboto ni Guru Mangaloksa, ima namargoar Si Turasi na muli tu marga Sitorus, Si Palangki tumarga Panjaitan, Si Sande (Matundi) tu marga Siahaan na di Sibuntuon dohot Si Tariparlan na muli tu Radja Marsundung marga Simajuntak na umpompar Parsuratan.

Ganup do nasida paopat mamboan arta tu huta na be. Ia di siahaan ima ulos ranterante sian alaman tu harbangan gandjang na. Di paduahon  seak-seak mas, di patoluhon  losung si sampulu dua baba, djala hauma parsuratan ma dina paopathon.

Tanggo di mulana, marhuta di Lobu Galagala Dolok Tolong Balige do Radja Hasibuan, rap dohot Radja Sumba dohot Radja Naipospos, alai bungkas ma di pudian ni ari tu Sigaol Uluan. Adong do dipungka huta dison, ima namargoar Hariara Mandjalo.
Alai hurang uli dope tano Uluan di roha ni Guru Mangaloksa, bungkas ma ibana tu Rura Silindung. Di tingki i, mabiar do sude pangisi ni huta na maringanan dingkan pat ni Dolok Siatas Barita ala ni pidong sipitu ulu-ulu na adang di dolok i. Ndang tarpasombu angka dakdanak na met-met marmeami di alaman, ala soro-soro do pidong i mangaluahon angka dakdanak i, laho panganon na, songon i nang angka pinahan.

Nang pe songon i, ndang adong halak na barani pulut laho pamatehon pidong i, hape di sada tingki ala ni hadjonggion ni Guru Mangaloksa dipatunduk ma pidongsipitu ulu-ulu i gabe sonang ma luat i. Djadi holong situtu ma roha ni Guru Manomba Bisa dohot sude pangisi ni luat i mida guru Mangaloksa. Toho adong boru ni Guru Manomba Bisa na margoar Si Tumaledung, laos i ma na gabe parsondukbolon ni Ompunta Guru Mangaloksa.
Di tingki i di dingkan habinsaran do marhuta marga Pasaribu, ima di Simorangkir nuaeng, marga Naipospos di djulu dohot di toruan (Banuarea), djala marga Sihite, Simamora, Bangkara dohot na asing di Peanadjagar Siualuompu.
Di na sahali, didok Guru Mangaloksa ma tu tuanboruna “Botima i boru ni Radjanami, ia boan ma djolo sipanganon tu halak amanta, mangido tano i saotik asa adong parguluan ni pathu” manghuling ma tuanboruna i, ninna ma “Olo ba anak ni namboru, molo laho ahu nimmu mangido na nidok mi,  na djadi do i” botima didok mangalusi tuandoli na.Asa saut ma borhat boru Pasaribu tu huta ni natoras na.

Dung dibege guru Manomba Bisa sian boruna pangidoan ni helana, dipatuduhon ma santurpuk hauma na taho bolak na. Atik na mambuat roha boru Pasaribu, didok ma mangalusi “Holan saotik do dipangido helam amang, asa adong parguluan ni patna”
Ia dung ma inon, diisi Guru Manomba Bisa ma tano tu parindahanan isian ni sipanganon na binoan ni boruna i, huhut ma di dok “on ma lehon dainang tu helangki”

Mulak ma boru Pasaribu tu djabu na, disigati Guru Mangaloksa ma parindahanan i, djadi songgot ma rohana ala tano do ida di bagasanna, dirimpu hian sipanganon. Hansit situtu ma rohana, tung songon sineat ni raut panabung ma ateatena di hilala. Madekdek sada ma iluna, madekdek dua, mardangir-dangir ni batu, marsimbur-simbur ni sipahadua. Sangam-sangamon ma ibana, ninna ma “Na so uhum do da, na so adat pambahenan ni amanta an.  Ndang hurimpu na tungkap maruhum, singgalak marroha amanta an, Sulang-sulang na taho hulehon, hape tano sanghimpal ma ulakna”
“Tali na tos, tu andor na pudun,Si ate-ete na tostos, sai solot do na lungun”.

Mangantusi do boru Pasaribu di muruk ni harajaon na i, djadi dielek-elek do nian asa mombun rohana, alai mitir pe borna ianggo muruk na i ndang na ra morupe.
Dung i ditahi roha ni Guru Mangaloksa asa bungkas hula-hulana Pasaribu i sian Rura Silindung, alai ndada dipabotohon i tu tuan boruna.

Asa dina saborngin, laho ma Guru Mangaloksa tu balian ni huta, diboan ma lasiak dohot napuran, pola manian godang na. Dungi dipambursikhon ma aek ni napuran i humaliang huta huhut diparserakhon angka sopa-sopana dohot angka bulung-bulung na marisi lasiak. Marnida pambahenan na I, suman ma tahe naung torop halak ro manghaliangi huta i.
Sumogot sian na somal, borhat ma ibana tu balian. Satongkin nari dipaula-ula ma humandjadja tu huta huhut digorahon naung dihaliangi musu huta nasida  borngin i. Laos ninna ma “Bereng hamu ma angka sopa-sopa ni napuran dohot lasiak naung gok humalian huta on, Hurara tung naung deak do musu i, na naeng  mambuhar hutanta on”. Alai nang pe sahat hata i tu Guru Manomba Bisa ndang pola bilalangon ibana, gariada ninna do “Baba ni asungki, begu aha na so adong di balian ni huta”. Djadi ndada pola disuru pangisi ni huta i marhobas mangalo musu na nidok na i, manang isara maporus rupani. Djadi mago botima halodjaon ni Guru Mangaloksa, ndang pul sinangkap ni roha, alai haru pe songon i, na ndang mandarse iluna, ingkon saut do nidok ni roha na.
Di na saborngin, dipambahen ma torop halak-halak di dolok ni Si Atas Barita, pola songon longa tinirtirhon deak na. Sude na i dibahen martali-tali na bontar sian bulung ni motung. Di pampantikhon muse ma angka hau na pinsur manuman-numan hudjur. Dunghon ni i, ditanom muse angka hodong ni poring humalian huta dohot di toru ni tangga ni djabu ni simatuana.
Asa ia dung ma inon, dibuha—buha idjuk midjur ma Guru Mangaloksa sian djabu na, dungi pintor hatop ma mulak marlojong tu djabu, dipaula-ula songon na bolak-bolak bohi na. Gogo djala songgot ma didok tu tuan boru na i :”Ida ma na di dolokan ! Nungga torop ro musu manghubu hutanta on” Umbege i, tarhutuk-tarhamut ma tuan boruna, midjur ma tu alaman, djala dung ditatap dompak dolok Si Atas Barita, marlodjongi ma ibana tu djabu ni natoras na huhut gora-gora “Musu…., musu….’. ninna, tarsonggot ma sude pangisi ni huta i. Mareak denek djabu ni natorasna, manggauk ma ibana, ninna ma “O… inang, dia tu son hudjurhi nungga djonok musu”
Umbege i, hapogan ma  boru midjur sian djabu, djala dung di dege toru ni tangga i, pintor ma songon suara ni bodil ala ni hodong ni poring na tartanom di si. Lobi songgot ma roha ni Guru Manomba Bisa dirimpu naung djonok situtu musu. Biahaton ma sude pangisi ni huta i djala dohot ma nang Guru Manomba Bisa maporus tu balian. Alai tu lam rangat na do tarbege soara na marlupuk-lupuk, rap-rap songon soara ni bodil ala tardege hodong ni poring naung rarak tartanom di si. Ndang dianturehon pangisi ni huta i be arta na, torop do sian nasida maporus dompak dolok  Siborboran. Dipaula-ula Guru Mangaloksa do dohot maporus dingkan pudi rap dohot tuan boruna.

Dung tarholip djala dao angka dongan na namaporus i, didok ma tu tuan boruna : “Olo ba inang boru ni radjanami, unang ma pola dohot hita maporus, mulak ma hita tu hutanta” Djadi mulak ma tutu nasida tu huta.
Alai adong do deba sian marga Pasaribu i na tinggal di huta, ala so sanga maporus manang dang tarbahensa.  Sian dolok Siborboran maporus ma marga Pasaribu tu Barus. Ima Alana umbahen didok halak udju i “Pasaribu ni aek ni poring”, tarsingot na ma i.

Di bagasan dame do parsaripeon ni Guru Mangaloksa dohot Boru Pasaribu huhut gabe ditumpak Debata na manompa, ai opat ma anak nasida ima : Radja Hutabarat, Radja Panggabean, Radja Hutagalung dohot Radja Hutatoruan. Sada do boruna ima namuli tu marga Radjagukguk Aritonang na tinggal di Pansur Napitu.
Ia dung ma inon,di sada tingki marsahit ma Guru Mangaloksa. Ala tar toho leleng parsahitonna, laho ma ibana rap dohot  anakhonna mebat tu Sigaol. Sian i laho muse ma tu Djandji Matogu tu huta ni ibotona na muli tu marga Sitorus. Alai dina laho mulak tu Silindung, sanga do nasida maringanan satongkin di Dolok Tolong Balige. Hape tompu ma posi sahitna. Sungkot ma pangatuan ni datu, ndang marlollo be tapar, ndang marpanghorhon be tambar sude na sian Debata na monomba laos dibandahon ma di Aek Radja, Lobu Parserahan.

Dung marudjung ngolu ni Guru Mangaloksa, sanga dope anakna na opat i mamungka huta dingkan Gurgur dohot Tangga Batu. Ia Si Radja Hutabarat dipungka ma huta na margoar “Nabarat”, Si Radja Panggabean mamungka huta “Sipitupitu”, Si Radja Hutagalung mamungka huta “Sipalihuta”, Djala Si Radja Hutatoruan mamungka huta na margoar “Meat”
Dungi di laon-laon ni ari borhat muse ma angka pinompar ni Si Radja Hutabarat, Panggabean, Hutagalung dohot Hutatoruan tu” Onan Runggu Sipahutar” djala leleng do nasida marhuta dison. Sian i marserak muse ma pinompar ni marga na opat i.
Sian marga Hutabarat adong na marhuta tu “Pea Arung, Parranginan, Simamora Nabolak, Bahalbatu, Pagarbatu, Hutagurgur “ djala tinggal ma deba di Onan Runggu. Sian marga Panggabean, adong ma tu “Pagarbatu, Ambar Hoda dohot tu Lobu Hole. Sian marga Hutagalung, adong deba tu Pagarbatu, Simamora, djala deba tinggal di Onan Runggu, Sian marga hutatoruan, adong lao tu Aek Las, Pagarbatu, Simanampang, deba tinggal di Onan Runggu.

Dina sahali masa ma di Onan Runggu na tuk palonganghon roha ni pinompar ni Guru Mangaloksa, Alana manang na piga-piga hali onan ma, djala marudut-udut do i, “holan samansam boniaga ni halak di onan”, isarana godang sambing, ndang adong boniaga na asing, Ia so i, di onan na mangihut pondil soban bangkudu, gabe lunda boniaga ganup onan. Pola mahat hata udju i na mandok “ Nungga rungkup songon boniaga bangkudu”
Ala ni longang ni roha ni pinompar ni Guru Mangaloksa di Onan Runggu mamereng na masa i, miduk ma datu naung dipasungkunhon atik aha alana umbahen masa na songon i, alai ndang adong naumbotosa.

Ia nungga pornungan i tutu   di djolma na mangolu, sai sungkunon do pande di hapandeonna, sungkunon do pargonsi na niuluhonna, i ma da alana umbahen borhat suruan ni pinompar ni Guru Mangaloksa tu Humbang pasungkunhon  tu Datu Dalu naung tarbarita songon tahaon daling. Mangihut pandok ni Datu Dalu i, Ingkon siapon ni pinompar ni Guru Mangaloksa ma holiholi ni ompu inon sian Toba asa tambak honnonna di Dolok Si Atas Barita. Djala ingkon pelehonon ma sada horbo ganup, asa tu simangat ni ompu i.  Asa dung dibege nasida hata ni Datu i, di djou nasida ma angka haha-anggi naung marhuta di luat na asing patubegehon hata ni Datu Dalu ondeng huhut patupahon na hombar tusi. Ia dung marpungu, satahi nasida asa sude pinompar ni Guru Mangaloksa na di Onan Runggu mulak tu Silindung, huhut i hian do tona ni ompu I, andorang di ngoluna. Dung  i di sada tingki borhat ma pinompar ni Guru Mangaloksa na di Onan Runggu tu Silindung. Alai dang didjalo marga Pasaribu na adong dope tinggal disi, gariada tahe dilului nasida mardongan hagogoon. Dibahen i mulak ma nasida tu Onan Runggu, dihara ma sude haha-anggina angka naung marserak i, dungi martalan ma nasida.

Asa djumpang ma dibulan na dapot ditingkina, borhat ma pinompar ni ompu I, sian Onan Runggu tu Silindung, ditungkup nasida ma huta Bonan Dolok Sisunggulon na diingani Pasaribu, maporus ma pangisi ni huta i, tu huta na balga na margoar Lobu Silindung. Sahali masa ma gora na suhu ai tutu, alai talu do Pasaribu i dohot pangisi ni Lobu silindung, laos dohot ma nang huta i ditungkum, ndang pola sadia leleng nai dibuhar muse ma angka huta na dingkan hasundutan dohot di djuluanna. Dung ditaluhon sude angka pangisi ni huta i, sahata ma nasida asa marga Panggabean dohot Hutagalung marhuta dingkan toruan, marga Hutatoruan di hasundutan, djala marga Hutabarat di djuluna alai laos adong tinggal di Lobu Silindung satonga sian nasida. Ndang sadia leleng nari masa muse ma paraloan dohot ompu ni Harungguan marga Siagian di Pansur Napitu. Ditaluhon do Ompu ni Harungguan inon laos marbulangtungko tu Pahae Onan Hasang.

Di laon-laon ni ari, ia marhordja ma Naipospos na di Banuarea, dipalu ma gondang di tonga alaman, dirambing ogung. Dung dapot tingki ni dongan tubuna na sian Sipoholon laho manortor, ia margora ma Baginda Soaloon tu pargonsi, ninna ma “ E… amang pargual pargonsi, bahen ma gondang  na bangbang di djae, na bongbong di djulu” lapatanna, namarhuaso di djae namarhuaso di djulu. Manortor ma nasida marhudjingdjang, marrogon-rogon, masipaherbang tangan dompak gindjang umbahen masa hata “marrogon-rogon songon tortor ni Banuarea”.

Umbege I, targisik ma roha ni pinompar ni Guru Mangaloksa, alana na pataridahon hatimboon do i, patubegehon huaso dohot hasangapon ni Naipospos, na songon dolok rupani, sada pat na di djae (Banuarea) na sada nari di djulu (Sipoholon). Ai piltik ni sagasaga do begeon alai sogo do ianggo piltik ni hata.
Di robean pinggol tubu, na tingkos djinalahan,
Djorbing anak ni mata, tu na hornop na binegena.
Asa i ma mula ni partanggalan na djumadi pargulutan. Ai manongtong do songon boanon bosi hata ni Ompunta sidjolo-djolo tubu na mandok “ Songon diape hagabeon di halak di atas tano on, na so djadi magakgakhu, songon diape hapogoson ni halak di toru ni langit na so djadi maundukhu”.

Dungi muse asa digora suhut na hombar balokna pinompar ni Guru Mangaloksa asa ro manortor. Ro ma tutu nasida djala dipangido ma gondang hinapit-hapit tu panggual pargonsi, ndang di paherbang tanganna songon ruhut-ruhut ni panortoran na somal, baliksa taha masihapit hampilna be huhut ma sipuhung tanganna tu andorana. Lapatanna, rade marporang mangalo Naipospos. Alai harupe masipuhung tanganna be tung samasoalin do panortoran nasida I, huhut djenghut, rombang tu soara ni gondang na patudjam-djam. Laos di borngi i do, marpungu siopat marga on mambahen partahian asa buharon Naipospos sian Banuarea.

Dung i marsogot na i, masa ma hamusuon, marporang ma pinompar ni Guru Mangaloksa maralohon Naipospos. Udjung na talu ma Naipospos, gabe bungkas ma Naipospos di Banuarea tu Sipoholon djala soluk ma marga Hutapea maringanan disi, rasi-rasa sadari on. Dung i asa marindukporang ma pinompar ni Guru Mangaloksa di Rura Silindung. Siala gora inon, djong-djong  do dipudian ni ari pardamean ditongatonga ni pinompar ni Guru Mangaloksa dohot pinompar ni Naipospos. Ditotophon do disi asa sude pinompar ni Guru Mangaloksa na marhuta dingkan djulu na masuk tu gomgoman ni Naipospos ingkon tunduk tu panggomgomion ni Naipospos. Nasa na solo ingkon tinggalhonon na  ma luat i. Djadi adong do tutu na olo tinggal, adong ma mandapothon angka haha-anggina di toruan. Dungi asa sonang ma pinompar ni Guru Mangaloksa maringanan di Rura Silindung songon i muse Naipospos di Djulu, marsurak-surak ma pidong silopak marolopolop pidong silogologo, maghuling ma ansosoit marende araroma.

Ia dung ma inon ditingki na uli di ari na denggan borhat ma pinompar ni Guru Mangaloksa tu Toba mangalap holiholi ni ompu i, ditambakhon ma di Dolok Si Atas Barita. Ihut tusi, satahi ma nasida pasahathon pelean tu Si Atas Barita manuruti tona ni Datu Dalu. Tung sude do pinompar ni ompu i ganup ripe mangalehon gugu na pasi horbo  pelean i, djala dibagasan ari naung tiniti, nasahonsa lahilahi, nasahonsa parompuan, na magodang dohot na menek marpungu ma di Onan Siborotan Simorangkir. Dipatupa nasida ma siulaon na hombar tu pandok ni Datu Dalu.

Dung dapot tingki naung binahul asa ditullang ma horbo pelean i dohot hudjur mundi-mundi, alai mangarunta ma horbo i sagogogona gabe malua sian borotan laos marlodjongi dompak Aek Rangat Hutabarat. Ditambing horbo i ma sada horbo na asing disi sampe mate. Sian i muse, ditulus marlodjongi dompak Harangan Nabolak Sitompul djala ditambing muse disi sada pinahan lobu sampe mate. Ndang mansohot dope horbo i, diulakhon dope marlodjongi dompak Lobu Silindung. Dung pe sahat di harbangan ni huta i asa marobo laos mate. Dungi dipelehon ma horbo i, dipadalan huhut pardjambaran tu situannatorop. Sun marsipanganon asa marhata ma, sada ma hata nasida songon daion aek manopot Datu Dalu pasungkunhon lapatan ni na binahen ni horbo pelean inon.
Asa manghuling ma Datu Dalu ninna ma :
1. Ia horbo na mate ditambing di Aek Rangat Hutabarat, na marlapatan do i, ganup-ganup pasahathon horbo pelean tu Si Atas Barita ingkon dohot ma laos di na sadari i pasahathon horbo pelean tu Sombaon Panabungan na maringanan dingkan Aek Rangat inon,
2. Pinahan lobu na ditambing di Harangan Nabolak, lapatanna, pasahaton ma pinahan lobu bahen pelean tu Harangan Nabolak laos dibagasan ari i,
3. Taringot tu inganan hamamate ni horbo pelean na di harbangan ni huta Lobu Silindung, na marlapatan do i, asa sian inganan i pasahaton horbo pelean tu Si Atas Barita dung djolo di borothon horbo i saborngin di Onan Siborotan djala ingkon adong hononhon na sa onan na margoar “Onan Silindung” di inganan i mangganti Onan Sanduduk.

Djadi marlolo ma angka radja-radja manontuhon horong-horong na pasahathon pelean tu Si Atas Barita, tu Panabungan, tu Same dohot tu Harang Nabolak, djala songon on ma partonding na :
1. Na pasahathon pelean tu Si Atas Barita ima pinompar ni Guru Mangaloksa Hutabarat, Panggabean, Hutagalung dohot Hutatoruan i ma na ginoar “Si Opat Pusoran”. Taringot tu goar Si Opat Pusoran on na binuat do i dung adong panolopion ni angka radja-radja na boi masialapan boru marga na opat i, djala undjuk na parjolo dibuat ma sigagatduhut songon pandjuhutina na opat pusoranna.
2. Na pasahathon pelean tu Sombaon Panabungan ima marga Sihite, Simamora, Bangkara, Hutauruk dohot na asing nai huhut diangkupi ganup-ganup marga Si Opat Pusoran. Horbo pelean tusi ¼ sian marga Hutabarat, ¼ sian marga Panggabean na maringanan di Lumban Ratus, udju i maringanan dingkan Aek Rangat/Aek Situmandi, ¼ sian marga Hutagalung na di huta Tarutung Hutagalung (Radja Pandua Ama ni Basa Hutagalung) djala ¼ nari sian marga Hutatoruan na maringanan di Simaung-maung dohot parbulu.
3. Na pasahathon pelean tu Sombaon Same ima marga Naipospos.
4. Na pasahathon pelean tu Harangan Nabolak ima marga Sitompul.
Laos ditontuhon ma dibagian Si Opat Pusoran taringot tu horbo pelean na tu Si Atas Barita. Sambariba ma sian marga Hutabarat dohot Panggabean, I ma na ginoaron “Na Bariba Horbo”, na sambariba nari sian marga Hutagalung dohot Hutatoruan na tong ginoaron “Na Bariba Horbo”.

Di bagian Siualu Ompu, marga Sihite, Simamora, Hutauruk, Bangkara, dohot na asing na i ma “Na Bariba Horbo” djala “Na Bariba Horbo” nari ima Hutabarat, Panggabean, Hutagalung dohot Hutatoruan.
Di bagian Naipospos, Sinagabariang dohot Hutauruk “Na Bariba Horbo” djala Situmeang ma dohot Simanungkalit “Na Bariba Horbo”.Sian on ma mulai adong bius di Rura Silindung.
Dung leleng di parlelengan, lalap diparlalapan masa ma ari logo ranggapuri di Rura Silindung pola tolu taon tolu bulan lelengna. Asa masa ma haleon potir. Asing sian i adong dope hinagaluthon ni roha, ai tung miduk do sian angka ina naso gabe-gabean. Nungga manang napiga-piga Datu disungkun aha alana umbahen masa na songon i, alai matua so adong do na umboto sa. Udjung na ditopot ma Datu Borhu Ni Adji, ninna nasida ma :
 “Sungkun ma djolo amang datunami Ompungta Debata na manitik, na mandjadi, na manompa, na manggaba, na patingko simandjudjung, na manompa salimbubu, na pabuha simalolong, na patinggil sipareon, na tumahap si manghudap, na pabungbung tolonan, na pahibul pusu-pusu, na pahembang ate-ate, na dumandang butuha, na parimpur djari-djari na sampulu, na tumogos djolma manisia tu toding Debata di tonga on, manang aha ninna na sala hubahen hami djala dia sipatupaon nami asa hupatupa hami”.

Di tilik datu i ma tiliktilikanna djala dipatorang ma aha alana umbahen songon i. Dung di patupa angka siulaon hombar tu na nidokna, mansadi ma roha na lulu-lulu djala sumineak ma nang panaili.
Manghuling ambaroba, di djulu ni tapian
Salpu ma hape holso ni roha, ro ma parsaulian.
Mangihut pandok ni datu inon, ingkon manopoti sala ma pinompar ni Guru Mangaloksa tu Pasaribu siala pambahenanna maradophon hula-hula i, di  tingki na salpu. Ala ni i, ingkon lehonon ni pinomparna, ima Hoda Sihaspili na nigoaran “Hoda Somba” tu hula-hula Pasaribu i naung gabe radja  di Tano Barus dunghonsa maporus sian Silindung.
Topot-topot do daon ni sala,
Somba-somba daon ni sola,
Tangan tardjama na ronsam
Aek do pamurina,
Pambahenan na sala
Uhum do parpaulina
Asa satahi ma radja-radja ni Si Opat Pusoran pasahathon hoda somba inon, ai nungga mardabu-dabu rohana songon pardjudji, mamilang-milang songon parmahan, mananda di salana, mamoto pipotna.
Alai bangkol do roha ni halak di tingki i marlampas tu Tano Barus, ai sipat tombak rimbun rea, tole muse panamun dohot pamangus. Djadi holan mara do sitangamon. Asa tung piso ninna sian gindjang, sangkalan sian toru, tung magulang ulu sian rungkung, marsapu rihit partaroktohan, ndada binoto dope leak ni i, atik adong halak na mangate borhat tusi. Djadi marhata ma angka radja-radja ni Si Opat Pusoran mangalehon hauma na marboni sa ampang ima si dua pulu opat solup tu manang ise na olo borhat tu Barus pasahathon hoda somba inon.Toho do saut manopoti sala Si Opat Pusoran tu hula-hulana Pasaribu, ai dipaborhat do opat halak tu Barus pasahathon hoda somba inon. Sahalak ma sian marga Hutabarat, sada sian Panggabean dohot Sitompul, sada sian Hutagalung dohot Hutatoruan djala sada ma sian Naipospos. Djadi las situtu ma roha ni hula-hula Pasaribu mandjalo haroroan nasida i, djala dipaborhat muse mulak tu Silindung dibagasan adat nagok. BOTIMA. Sumber : Adniel L. Tobing dohot Sahala L. Tobing,"Buku Tarombo Si Raja Lumban Tobing"  cetakan pertama taon 1972.

Heffri Hutapea Hanya takutlah akan TUHAN dan setialah beribadah kepada-Nya dengan segenap hatimu, sebab ketahuilah, betapa besarnya hal-hal yang dilakukan-Nya di antara kamu.

Share :